الحمد لله والصلاة والسلام على رسول الله
اما بعد
كل شوية يجيلي ع الاميل ولما ادخل اي منتدى الاقي فيه احاديث بتتبعت وتتكتب ويتكتب فيها قال رسول الله صلى الله عليه وسلم كذا
الكلام يعجبني جدا واتاثر بيه بس يدور في ذهني سؤال
هل فعلا الرسول عليه الصلاة والسلام قال كده ؟
ولا ممكن يكون كلام أي حد تاني ومنسوب بس للنبي عليه الصلاة والسلام
اللي اعرفه ان أي كلام ثابت ان النبي عليه الصلاة والسلام قاله لازم يكون على عيننا وراسنا واي امر فيه ننفذه واي نهي فيه منعملوش واي خبر فيه نصدقه
اما كلام أي حد تاني مهما كان الحد ده مهما كان ممكن اخد بيه وممكن لا ومش بمزاجي برضه يعني لو موافق للقران والسنة ناخد بيه لو مخالف مناخدش بيه خالص
وساعات اسال نفسي سؤال
طالما الكلام حلو وكويس ويقرب من ربنا وانا مش هدفي الا الخير للناس ونفسي الناس كلها تتقرب من ربنا ليه منشرش الخير ده عليهم
ليه كل ما يعجبني حديث واحد يقولي ده حديث ضعيف او ده حديث موضوع
ايه المانع اني انقله طالما كلام حلو؟
وسالت بعض الشيوخ في السؤال ده بالذات
قالولي اجابات مرعبة فظيعة
قالولي انت كده بتقول قال رسول الله ؟
قلت صح بقول
قالوا وهل انت متاكد ان رسول الله قال ؟
قلت الله اعلم ممكن اه وممكن لا
قالولي انت لما تقول على حديث قال رسول الله وهوا مقالش تبقا بتكدب عليه لانك بتقول كلام على لسانه هوا مقالهوش
وفيه حديث صحيح بيقول فيه الرسول صلى الله عليه وسلم
(إن كذبا علي ليس ككذب على أحد من كذب علي متعمدا فليتبوأ مقعده من النار" رواه البخاري)
وفيه حديث تاني بيقول فيه
(لا تكذبوا علي فإنه من كذب علي فليلج النار ) رواه البخاري
(من حدث عني بحديث يُرى أنه كذب فهو أحد الكاذبِِينَ) رواه مسلم
بصراحه خفت وقلت معقولة وسالتهم حتى لو نيتي كويسة مش عاوز الا الخير للناس
قالوا لي كلمة بجد انهت كل اللي في دماغي خالص وخلتني اقول معاهم حق
قالولي لما ربنا نزل الاية
(اليوم اكملت لكم دينكم )
الدين ساعتها كان اكتمل ولا لا ؟
قلت صح اكتمل
قالولي هل قصر النبي صلى الله عليه وسلم في تبليغ الناس الرسالة ؟
قلت لا وحاشا لله ان حد يقول انه قصر
قالولي يعني الدين مش في حاجة للاحاديث اللي مش متاكدين من ان الرسول عليه الصلاة والسلام قالها؟
قلت صح لان الدين اكتمل
قالولي يبقا معناه ايه اننا نسيب ايات القران والسنة الصحيحة مننشرهاش وننشر الاحاديث دي؟
قلت معناه اننا كده بنقول ان الرسول عليه الصلاة والسلام مات ولم يكمل لنا الدين بدليل ان فيه ناس بتكمله من بعده وبتنسبه كذب للرسول عليه الصلاة والسلام
وساعتها اكتشفت اني كنت غلطان
لا غلطان دي شوية
معلش مكنتش عارف
سالتهم طيب انا مش عالم زيكم اعرف منين ان ده صحيح ولا مش صحيح وهل انشر الحديث ده ولا لا؟
قالولي كلمة مريحة جدا
قالولي اعتبر كل حديث قدامك انه غير صالح للنشر الا بعد التاكد من احد العلماء انه صحيح او موجود في الكتب اللي فيها احاديث صحيحة
سالت زي ايه ؟
قالولي فيه كتابين لو الحديث موجود فيهم اتاكد تماما ان الرسول عليه الصلاة والسلام قاله وانشر يا عم براحتك دول اكتر من 8000 حديث في كل النواحي اللي تهم المسلم
والكتابين هما صحيح البخاري وصحيح مسلم
واي حديث تاني بعد كده لازم حد من العلماء انه يكون قال ان الحديث ده صحيح زي الشيخ الالباني وغيره من العلماء
بصراحة مكنتش فاكر ان الموضوع خطر بالشكل ده
انا كنت حاسس اني باعمل خير وبس
قالولي لا ده بعد موت النبي صلى الله عليه وسلم فيه ناس حبت تهدم الاسلام فالفت احاديث ونسبتها للنبي
بس ربنا هيأ لدينه علماء بذلوا عمرهم كله عشان ميدخلش حديث من الكذب ده على سنة النبي صلى الله عليه وسلم فعشان كده لازم قبل ما نتكلم ونقول قال رسول الله صلى الله عليه وسلم اننا نتاكد الاول
وساعتها قررت اني فعلا لا يمكن هقول على أي كلمة قال رسول الله الا بعد ما اتاكد الاول
لاني مش عاوز ادخل النار من الباب اللي عاوز بيه ادخل الجنة
بس سالتهم قبل ما امشي
واللي فات ؟
قالولي اللي فات ربنا يعفو عنه لانك مكنتش عارف واديك عرفت فمتكررش الغلط تاني ونبه اخوانك وكل حبايبك اللي بيحبوا الخير زيك انهم ميقعوش في نفس الغلط
ايه رايكم اخوانى واخواتى فى الله فى نقل هذا الموضوع الخطير
مستنيه رايكم
وربنا يسترنا في الدنيا والاخرة ويتجاوز عننا ويتقبل مننا
والسلام عليكم ورحمة الله وبركاته
منقول للاستفاده منه
مع اطيب