عشر نصائح جامدين للمدرسين المساكين

لو كنت اشتغلت قبل كدة مدرس أو بتفكر تشتغل فلا بأس مطلقا... إليكم خلاصة تجربة.. احدى المدرسات...

أولا: لازم تكون صاحب عينين واسعتين ويستحسن ماتكونش ملونة ولازم تتعود تبرق دايما ولما تتنرفز عينك تطق شرار "لزوم إرهاب التلاميذ عصافير الجنة!".

ثانيا: يجب أن تكون بصحة جيدة وخاليا من الأمراض البسيطة والمستعصية. وخصوصا الأمراض النفسية ولابد أن تكون متفائلا زيادة عن اللزوم "عشان القهر اللي هتشوفه يعني!"

ثالثا: تكون عندك مناعة قوية ضد الأمراض بداية من أمراض الشتا والبرد لأن الفصل عندك مش هيبطل كحكحة "كح كح" وعطس "أتشووو".. انتهاء بأمراض الغدة والجدري والحصبة. وكل أمراض العيال الحلوين!

رابعا: أمن على حياتك بمبلغ محترم. وماتقلقش على الأقساط مش هتلحق تدفع قسطين على بعض... ومبروك مقدما للورثة!

خامسا: اوعى تدخل الفصل وموبايلك مفتوح علشان لو جالك مكالمة مش هتسمع كلمة من الدوشة والهيصة والزمبليطة اللي هيعملوها الأولاد علشان يبينوا للي سيادتك بتكلمه قد إيه إنت شخصيتك قوية ومسيطر عليهم!.. ويا عيني بقى لو كان اللي على التليفون الجو ولا المدام ولا أخوك الصغير يبقى ضمنت إنك في البيت كمان هتعيش مغلوب على أمرك!ويا ويلك يا سواد ليلك لو جالك "ميسد" بس مش هتخلص من التريقة عليك وعلى اللي رن لك وعلى بخل الناس في الأيام دي.الحاجة الوحيدة اللي ممكن تستفيد فيها من الموبايل إنك تلعب games في أوقات فراغك!

سادسا: إنت محتاج عصاية من النوع اللي بيعمل صوت مرعب في الهواء تهوش بيها بس. وخليك فاكر إن الضرب ممنوع بقرار من الوزارة.. بدل ما يقوم عيل مفعوص يفكرك بيها وعلى شفتيه ابتسامة تحمل خبث الدنيا كلها.

سابعا: لو عندك استشارة عن عطل عندك في الكمبيوتر أو الموبايل أو البلاي استيشن ماتروحش بعيد لأن عندك دكاترة متخصصين ورؤساء قسم في الفصل بتاعك ومستعدين لخدمة سعادتك والتوصيل للمنازل كمان.. وكله بالمجان!

ثامنا: اوعى.. وبكرر اوعى تسأل السؤال ده.. "نفسك تبقى إيه يا حبيبي لما تكبر؟".على غرار ما كان يفعله معنا مدرسونا زمان.. لأن الإجابة ستفجعك وهتنسد نفسك عن الحياة كلها!فلن تخرج الإجابة عن: هو حد لاقي شغل الأيام دي لما احنا هنلاقي.. أو عايز أشتغل "نانسي عجرم".. قصدي أغني زي "نانسي عجرم"!!!! مش قلت لك بلاش تسأل..

تاسعا: لو بتفكر تدي درس خصوصي.. فلازم تعرف إن نظام الدروس في ابتدائي نظام عجيب جدا لو عرفته الأمم المتحدة لضربتنا بصاروخين أرض جو!.. لأن لو سعادتك فكرت تدي درس ولو إن تخصصك لغة عربية مثلا فهتلاقي ولي الأمر يقول لك: "أنا عايزك تدي له كل المواد على بعض يا بلاش! "شروة يعني على بعضها".فستجد نفسك مطالبا بشرح العربي والحساب والعلوم والدراسات والإنجليزي... يعني لو إنت كنت متعقد من مادة معينة من صغرك؛ وحمدت ربنا وشكرته إنك خلصت منها ودخلت كلية بعيدة كل البعد عنها، فلا وألف لا! المادة دي مش هتسيبك في حالك وبدل ما كنت زمان مغصوب إنك تذاكرها وتفهم اللي تفهمه على قد ما تقدر وتطنش اللي ماتفهموش وتحشر مخك بالمعلومات وتخش اللجنة تفضي دماغك في الورقة وتخرج من اللجنة دماعك أبيض يا ورد، فدلوقتي الكلام ده ماينفعش.. إنت لازم تذاكر وتفهم كل حاجة وتحاول تبحث وتنقب عن كل خفايا المادة دي وإلا لو سألك تلميذك النجيب عن أي سؤال وماعرفتش هتبقى في نظره زي الـ.... الـ..... ولا بلاش! فخليك شطور وراجع اللي فاتك واللي ماتعلمتوش زمان جه الوقت اللي هتتعلمه فيه رضيت أم أبيت!!!!! وماتقولش التعليم كان زمان.. النهارده ممكن تتعلم قبل ما يفوت الأوان.. فصول محو الأمية في كل مكان!

عاشرا: خليك الشاب الروش واعرف الدنيا ماشية ازاي واتعلم الروشنة من طلبة الفصل بتوعك.. مش عيب إنك تتعلم منهم زي ما بتعلمهم، بدل ما تبقى واقف في الفصل مش فاهم حاجة من اللي بيقولوها..ولو مكسوف ونفسك مش مطاوعاك تسأل المفاعيص دول.. عندك "اللمبي" و"عوكل" و"بوحة" اشتري الأفلام واسهر عليها واحفظها عن ظهر قلب وبعدين اقف قدام المرايا واتدرب على تحية الصباح الجديدة واترحم على تحية صباح زمان أيام ما كان المدرس من دول يدخل الفصل ويقول: "صباح الخير".. فيرد عليه الفصل في نفس واحد ولا أحسن أوركسترا: "صباح النور على البنور يجعل صباحنا هنا وسرور"...فده كان زمان وراح لحاله.. من هنا ورايح ادخل الفصل واملأ صدرك بنسيم الصباح وبصوت ملعلع كده قول: "صبح صبح يا عم الحج"!!

ياجمال المدرسين والمدرسات

نصائح اكيد مهمه

شيروت

ربنا يكرمك فرحتينا اوى

بس مستنى باقى المهن

ها
علشان الكل يقعد فى البيت

حديث الروح كتب




ياجمال المدرسين والمدرسات

نصائح اكيد مهمه

شيروت

ربنا يكرمك فرحتينا اوى

بس مستنى باقى المهن

ها
علشان الكل يقعد فى البيت
_________________
اسعدنى مرورك ويارب تبقى فرحان ديما
اوكى هاحول اجبلك باقى المهن
بس انتى كده هتوقعنى مع المهندسين
وما اكثرهم فى منتدانا
___________
علشان الكل يقعد فى البيت
احننا كده كده قاعدين فى البيت
سلام

محمود خضر كتب
ههههههههههههههههههههههه

نصائح جامدة فعلا

شكرا لكى موضوع جميل ودمة خفيف بس للاسف هو دا الحال دلوقتى او الغالبية كدة


فعلا هذا حالنا وهذه دنيتنا فلا مفر
اسعدنى مرورك
شكرا لك على الرد وعلى المتابعة
سلام

اولا
الموضوع جميل جدا ولكن من وجه نظرى المتواضعه ينفع قصه فكاهيها اكتر لان المدرس مدرس فى كل الاوقات
ثانيا
انا باولكى اللوم عليك فى شى تقول ان المدرس مايكونش عنيه ملونه غيره مثلا او ايه عالى فكرة انا مش مدرس ولكن هذا رائى ممكن يكون صائب وممكن لا يكون
ثالثا ننتظر منك المزيد
وشكرا لسعه صدرك

قطر الندى كتبت
شيروت---مرسي ليكي كتير موضوعك الكميل دول
على ايه ميرسى ليكى انتى على الرد وعلى المتابعة

ونصائحك الجامده جدا

وفعلا كل من تضطره الظروف الي ان يعمل مدرسا

هذه الايام سيحتاج لها كثيرا

اصل كل حاجه حولينا اتطورت

فكان لابد ان العلاقه بين الطالب والمدرس تطور
فعلا هو ده التطوير العلاقة اساسا متطورة لوحدها يعنى مش محتاجة تطور اكتر من كده
والا هنقفل المدارس

بس تقريبا هم عملوا تبادل في الادوار

جميله فعلا______________________________

المهم -----سيبك انتي

موضوعك حلو ووفكاهي وكوميدي و----

صبح صبح يا عم الحج
بوحة بقى ومحمد سعد الى اصبح مسيطر على كتير مننا وخصوصا الاطفال
شوفتي مخليين البساط احمدي

عجبي عليك يا هذا الـــــــــــزمن

________________________________

سلامي ليكي

ومستنيين نصايح جامده اكتر واكتر

وعليكم السلام ورحمه الله وبركاته

احمد خضر كتب
موضوع جميل ومضحك ومؤسف فى نفس الوقت لانه هو الحال الذى عليه الان اصبح التلميذ لايحترم الاستاذ ولا يوقره واصبحت العلاقه التى تربط الطالب راستاذه علاقة ماديه بحته

شيروت موضوعك رائع ومضحك وفيه نصائح غاليه للمدرسين ممكن الواح ينقلها ليهم علشان ينتبهوا ليها
تقبلى مرورى والسلام عليكم ورحمة الله وبركاته
______________________
اوكى دى مهمتك بقى انقلهم النصائح وينتظروه المزيد والجديد
للاسف هذا حالنا وعلى راى قطر الندى
عجبى عليك يا زمن
مرور جميل واكيد متقبلاه
سلام

ابو سيفيان كتب
اولا
الموضوع جميل جدا ولكن من وجه نظرى المتواضعه ينفع قصه فكاهيها اكتر لان المدرس مدرس فى كل الاوقات
ثانيا
انا باولكى اللوم عليك فى شى تقول ان المدرس مايكونش عنيه ملونه غيره مثلا او ايه عالى فكرة انا مش مدرس ولكن هذا رائى ممكن يكون صائب وممكن لا يكون
ثالثا ننتظر منك المزيد
وشكرا لسعه صدرك
_________________
اولا انا مش فاهمة كلامك بالظبط بس
شكرا ليك على الرد وعلى المتابعة
توضيح
انا لما نقلت الموضوع لم اقصد منه التقليل من مكانه المدرسين ابدا
بس حبيت اتكلم عن واقع مؤلم باسلوب فكاهى
فالمدرس مدرس
وانا واحدة من الناس بدين لهم بجميل كبير جدا
لانهم هم السبب بعد ربنا سبحانه وتعالى فى الى انا وصلته
وطبعا والدى ووالدتى وانا طبعا لا اقلل من مجهودى
ارجو ان تكون وجهة نظرى وصلت
انا واحدة من الى بيقدروا مكانه المدرس حتى بعد التطور الرهيب الى حصل
حصل خير وخلينا فى موضوعنا
وشكرا مرة تانيه لحضرتك
سلام

أمن على حياتك بمبلغ محترم. وماتقلقش على الأقساط مش هتلحق تدفع قسطين على بعض... ومبروك مقدما للورثة
إنت محتاج عصاية من النوع اللي بيعمل صوت مرعب في الهواء تهوش بيها بس. وخليك فاكر إن الضرب ممنوع بقرار من الوزارة.. بدل ما يقوم عيل مفعوص يفكرك بيها وعلى شفتيه ابتسامة تحمل خبث الدنيا كلها.


لو عندك استشارة عن عطل عندك في الكمبيوتر أو الموبايل أو البلاي استيشن ماتروحش بعيد لأن عندك دكاترة متخصصين

جامدة اوي اخر نصيحة دي
صبح صبح ياعم الحج

شيروت كتب:

تاسعا: لو بتفكر تدي درس خصوصي.. فلازم تعرف إن نظام الدروس في ابتدائي نظام عجيب جدا لو عرفته الأمم المتحدة لضربتنا بصاروخين أرض جو!.. لأن لو سعادتك فكرت تدي درس ولو إن تخصصك لغة عربية مثلا فهتلاقي ولي الأمر يقول لك: "أنا عايزك تدي له كل المواد على بعض يا بلاش! "شروة يعني على بعضها".فستجد نفسك مطالبا بشرح العربي والحساب والعلوم والدراسات والإنجليزي... يعني لو إنت كنت متعقد من مادة معينة من صغرك؛ وحمدت ربنا وشكرته إنك خلصت منها ودخلت كلية بعيدة كل البعد عنها، فلا وألف لا! المادة دي مش هتسيبك في حالك وبدل ما كنت زمان مغصوب إنك تذاكرها وتفهم اللي تفهمه على قد ما تقدر وتطنش اللي ماتفهموش وتحشر مخك بالمعلومات وتخش اللجنة تفضي دماغك في الورقة وتخرج من اللجنة دماعك أبيض يا ورد، فدلوقتي الكلام ده ماينفعش.. إنت لازم تذاكر وتفهم كل حاجة وتحاول تبحث وتنقب عن كل خفايا المادة دي وإلا لو سألك تلميذك النجيب عن أي سؤال وماعرفتش هتبقى في نظره زي الـ.... الـ..... ولا بلاش! فخليك شطور وراجع اللي فاتك واللي ماتعلمتوش زمان جه الوقت اللي هتتعلمه فيه رضيت أم أبيت!!!!! وماتقولش التعليم كان زمان.. النهارده ممكن تتعلم قبل ما يفوت الأوان.. فصول محو الأمية في كل مكان!
قول: "صبح صبح يا عم الحج"!!

اكيد نصائح مهمه

تقبل مرورى

طبعا معنديش حاجه أقولها غير
الله يكون فى عون المدرسين
والله يخربيت وزارة التعليم كلها
لانها وزاره تقريبا كده متخلفه بكل المقايس
وكمان الله يكون فى عون الطلبه
والله غلابا
شكرالك على هذ الموضوع