طريقة عمل القلقاس من مطبخى ,,, بالصووووووور

يلا نشوف مع بعض طريقة عمل أحلى طبق قلقاس

أولا: نجيب اللحمة عشان القلقاس المفروض انه يتعمل بشوربة لحمة بيكون أحلى وأطعم من الماجى

هتقولولى وايه لازمة الدهنة اللى فى النص دى

أقولكوا انها بتدى دسم للشوربة وبتخليها جميلة أوى وريحتها حلوة

هتجيب اللحمة ونقطعها (أنا بغسلها فى ناس مبتغسلش اللحمة) ونحطها فى حلة على نار هادية

ونرش عليها فلفل أسمر عشان يضيع الزفارة اللى فيها

نجيب بصله متوسطة

ولو هنعمل شوربة عادية هنقطع البصلة دى مكعبات صغيرة أوى ونشوحها مع اللحمة

لكن لو هنعمل القلقاس مش هينفع نقطعها مكعبات صغيرة عشان هتظهر فى الشوربة لما نضيفها للقلقاس

هى ممكن تتصفى بس هتبقى شغلانه وتعب قلب

الأحس نقسم البصلة نصفين بالطول ونشوحها مع اللحمة

ده شكل اللحمة بعد ما اتشوحت بتكون أكنها مستوية ومتحمرة من بره

هنضيف عليها الماية بحيث انها تغطى اللحمة

ونخلى بالنا إن جزء من الماية هيتبخر أثناء ما اللحمة بتستوى

أول ما نحط الماية هنلاقى لونها اتغير وبقت لون الشوربة

هنعلى عليها لحد ما تغلى

وبعدين نوطى عليها خالص ونغطى الحلة

وشوية هنفتح عليها ونضيف الملح

وأنا بضيف عليها حبهان وورق لورى

ونغطى عليها تانى ونسيبها لحد ما تستوى

هنعرف منين ان اللحمة استوت ؟

هتجيب قطعة لحمة من الحلة ونحطها فى طبق ونحاول نقطعها بالمعلقة

لو اتقطعت بسهولة يبأه استوت

لو لسه قاسية يبأه نسيبها شوية كمان على النار

المدة اللى بتحتاجها اللحمة عشان تستوى بتعتمد على نوع وسن القتيل اللى أخدنا منه اللحمة

نجيب خضرة القلقاس الا وهى الكسبرة

نجيب ربطتين لو هنعمل ثلث كيلو قلقاس

هى عامة الخضرة بتكون على حسب الرغبة وأنا بحب القلقاس مايته تقيلة

هنغسل الخضرة كويس وننقعها فى ماية وشوية خل

اسألونى ليه يا ام عمار ننقعها فى ماية بخل ؟

أرد وأقول عشان لو على الخضرة حشرات لا تُرى بالعين المجردة أو بيض حشرات يموت على طول بالخل

يعنى أكننا بنعقم الخضرة
تمام كدة
هناخدها ونصفيها ونسيبها تنشف شوية

بعد كدة هنقطع الخضرة أكننا بنقطعها للمحشي

وممكن أصغر من الصورة كمان بس أنا كنت مستعجلة عشان كان فى عربية اسعاف على باب المطبخ مشغلة السرينة بتاعتها

هنجيب الخضرة ونحطها فى طاسة يفضل تيفال ومعاهم معلقتين زيت ممكن زيت زتون أو زيت عادى أو سمنة زى ما تحبي

ونهدى النار خاااالص

ونفضل نقلب فيهم هنحس ان حجم الخضرة بيقل وكمان لونها بيغمق ومايتها بتنشف وورقها بيدبل

عادى بتحصل فى أحسن العائلات

هنجيب التوم وندقه

تقريبا أربع فصوص توم كبار

أو على حسب الرغبة

بس ما نضيفش التوم للخضرة الا لما نحس انها دبلت خاااالص ولونها اتغير وبدأت تنشف

لأن التوم بيحمر بسرعة ومش بياخد وقت كبير زى الخضرة

هنا شكل التوم والكسبرة قبل ما أطفى عليها بحاجة بسيطة

هنلاحظ ان الكسبرة لونها أغمق وحجمها قل

وكمان هنسمح خرفشتها فى الطاسة

ولو حطينا ايدنا عليها هنحس انها ناشفة وبتخرفش فى الطاسة

هنستنى لما التوم يغمق خالص وبعدين نطفى عليها ونسيبها تهدى شوية

فى ناس بتطحن الخضرة فى الهون وفى ناس بتعملها فى الكبة

أنا بعملها فى محطنة التوابل الصغيرة اللى بتيجى مع الخلاط وبتكون بالشكل ده بعد الطحن

نيجى باه لأهم حاجة وهى القلقاس

أنا معرفتش أوريكوا طريقة تقطيعه لناى كنت مخزناه فى الفريزر

بس عامة أنا بحب أقطعه الحجم ده

وفى ناس بتقطعه أصغر من كدة

بنجيب حلة فاضية ونحط فيها شوربة اللحمة ونضيف عليها شوية ماية

هنعصر عليهم نص لمونه

ولما الشوربة تغلى نضيف القلقاس

ونهدى النار

هنا أنا كنت فاكرة انى مطلعة ثلث كيلو لكن لقيت فى الكيس نص كيلو فعشان كدة الخضرة هتكون قليلة شوية على الكمية دى

وكل شوية هنفتح عليه ونحاول نقطعه بالمعلقة لو حسينا انه نص سوا نبتدى نضيف الخضرة واللحمة

انا بحب أقطع اللحمة مكعبات صغيرة وأضيفها للقلقاس

هنا بعد ما ضفنا الخضرة واللحمة

هنغطى عليه ونسيبه يستوى مع الخضرة واللحمة

هنا بعد ما القلقاس استوى

طبعا الماية قلت مع السوى

عشان كدة بنضيف شوربة بزيادة عشان نعمل حساب التبخير اللي هيحصل

وبس كدة نكون خلصنا طريقة عمل القلقاس