وحوي يا وحوي

[ندعوك للتسجيل في المنتدى أو التعريف بنفسك لمعاينة هذه الصورة]

وحوي ياوحوي

وكمان وحوي

جيت يا رمضان

وحروف الثورة مرسومة

على كل لسان

وشباب يتحدى الريح الشارد

فى الميدان

وعيون الفجر السهرانة

تتمنى تطل على الشجعان

وتحرك كل عناد منصوب

والذل اللى اتشعب فينا

أصبح مغلوب

رمضان

ياشهر البركة

وشهر الرحمة

وشهر الخير

تلاتين سنه نسكن

في الأحزان

نفطر على قلة أوجاعنا

نتسحر على حلم المساكين

ونشيل الطين

ولا حد يحس بأوجاعنا

ولا مرة يقدر أوضاعنا

وكأننا فعلا يا بلادنا

مش بنى آدمين

رمضان أهو جاي

بس المره دي بطعم جديد

لابس خلقاته ويتعكز

على حلم وليد

ويقول يا بلدنا يا منصورة

يا بلاد الثورة المعصورة

بين طعم الحزن اللى مالينا

وكلاب بتشوه فى الصورة

من غير تأكيد

وحوي ياوحوي

وكمان وحوي

جيت يارمضان

والحلم أهو راكب

ع الشبابيك

مستني ضمير البشر يقوم

مستني لسان الخلق يصوم

عن كلمة تهز قلوب الناس

مستني هدوم من الاحساس

تلبسها الناس العنديه

فى أيام العيد

[ندعوك للتسجيل في المنتدى أو التعريف بنفسك لمعاينة هذه الصورة]