رمضان وصل خلاص ..ولما رمضان بيجى شوشو بيسلم عدته وهيمشى مالوش أكل عيش على كوكب الارض ف الشهر ده ولذلك
بيشوفله كوكب تانى (يسرح بعنب ف المشترى ..بخوخ ف عطارد )المهم ان مش هيفرش بترنجات ف بلوتو
المهم انه مش هيبقى معايا
هو بصراحه كان
كابس علي انفاسي..
صحيح اني هتخلص منه لمدة شهر واحد . لكنها فترة كافية عشان أستريح بقى من المشاكل اللى غرقنى فيها . وشوشو ده معرفة قديمة أوى أفتكر من أيام الطفولة
ومن ساعتها وهو لازقلى ومش عارف أخلص من غلاسته ورزالته.مخلوق متطفل جدا بيتدخل في شئوني العامه والخاصه ويفتي في اللي ليه واللي مالوش فيه ومن
بجاحته أنه بيفرض على رأيه ويخليني أعمل اللي هو عايزه. وأنا من خيبتي باسمع الكلام اللي دايما بيوديني في ستين داهية وبالرغم من اني بكرهه كره العمى الا
اني مقدرش أستغني عنه!!
يمكن علشان اتعودت عليه..ويمكن عشان بيعرف يدخلى صح ..ويمكن كمان من قلة ايمانى .. ...و يمكن لانه ذكي جدا وبيعرف انا عاوز اعمل ايه قبل حتي ما افكر فيه .. يمكن علشان قدامي طول الوقت...مالوش شغلة ولا مشغلة غيري....!!!
علي فكرة(شوشو) ده اسم الدلع لكن اسمه الحقيقي (شهبور بن المشرور).. انتو مستغربين ليه؟ هو أسم الشيطان المسئول عنى واللى ناوى يودينى ف داهيه
ويعتبر ده الشيطان الخصوصي بتاعي... يعني ولا مؤخذه قريني.. زي ما كل واحد منكم ليه قرين وأكيد كل واحد منكم هيستريح من الشيطان بتاعه في شهر
رمضان... والسبب ان البعدا هيشرفوا في الحبس شهر مع الشغل و النفاذ....يستاهلوا!!
تصورو ابن الجنية جالى قبل رمضان بيوم وقعد يعيط ويقوللي: اهئ اهئ اهئ: أنا جاي اودعك قبل ما اتحبس ماتنساش العيش والحلاوه اهئ اهئ.. انت عارف
يا؟؟؟؟؟؟(اسم الدلع على أساس انه صاحبى وكدا ) أنا مش مزعلني غير أني حاسيبك لوحدك وأكيد هتمشي علي حل شعرك.... وهتعرف ربنا براحتك ف رمضان
الله يخرب بيتك يا شوشو هو أنا لما اعرف ربنا ابقي ماشي علي حل شعري.. طب بالعند فيك هاعرف ربنا وهصلي وهقرا قرأن كمان
.. وقعد يكمل الملعون العياط وقال : بقي كده بقي كده يا صاحبي يهون عليك العيش والملح.... دي العشره ماتهونش الا علي ولاد الحرام ا هئ ا هئ اهئ مش
عارف هتصلي ازاي لوحدك من غيري وانا بونسك واحكي معاك واحل لك كل مشاكلك واقول لك اخر نكته واحكي لك الحلقه الاخيرة من المسلسل وأهشتكك
وأبشتكك... لغاية ما الاربع ركعات يعدوا من غير ما تحس بيهم
قلت له: الله يخرب بيتك... هو اللي بتتكلم عنه اسمه صلاة. نفسي وانا بصلي احس اني بتكلم مع ربنا... نفسي اعيط في الصلاة.
لقيت ابن العفاريت فط ونط زي اللي لسعته عقربة... وزعق في وشي: هي حصلت انك تعيط... يا خسارة تعب السنين..ياخيبتك يا شهبور ياخبيتك صوتى ياللى
انتى مش غرمانه ... وقعد يلطم علي وشه ويقول: ياشماتة اخواتك الشياطين فيك يا شوشووقعد يلف حوليا زى التعبان ويوشوشنى ف ودانى ويقول : هاتعمل ايه
في المحاضرات من غيري مين اللي هيحكي لك حدوته قبل النوم.. ويشد عليك اللحاف... ويغني لك(نام يا حبيبي نام وادبحلك لك جوزين حمام) طب بلاش .. مين هايلفت نظرك لجمال الطبيعة ويقولك: (شوف الغزال اللي ماشي علي الرصيف.
الله يخرب بيتك... روح الله يجحمك مطرح ما انت رايح..اللهى ماترجع ولا عربيه تدوس على دماغك وانتا رايح ووانتا جاى ...
يارب الشهر يبقي تأبيدة .. ولا أعدام علشان استريح منك علي طول..
رجع الموكوس للعياط تاني وقال: واهون عليك ده بدل ما تدعيلي اطلع حسن سير وسلوك انت عايزني أخلل ف النار لوحدي... دي حته جهنم مالهاش طعم من غيرك زعقت فيه... جهنم لما تحرقك وتحرق اهلك نفر نفر ...
الله يلعنك اكتر ما انت ملعون غور من وشي.. أعوذ بالله من الشيطان الرجيم
وسبته يمشى وهو بيجرجر ديله من الخيبة...
وقال :انا مش حزعل منك... انا هديلك مهلة تفكير.. ورمى ادامى ورقه صغيره كدا فيها رقم تليفون وقال لي: لو احتجت لاي حاجه في شهر رمضان ها تبقي
تكلمني علي موبايلى يالا سلام
موضوع: حوار بينى وبين شوشو 
